Liens d'accessibilité

Dernières nouvelles

Tshisekedi, Thambwe, Mabunda na Ilunga basololi mpo na likambo ya Congrès


D-G:Mokambi ya Assemblée nationale Jeanine Mabunda pembeni ya mokambi ya Sénat Alexis Thambwe Mwamba nsima na bokutani na président Félix Tshisekedi na N'Sele, Kinshasa, 14 avril 2020. (Facebook/Présidence RDC)

Président Félix Tshisekedi asololi na mokambi ya Sénat, Alexis Thambwe Mwamba, na mokambi ya Assemblée nationale, Jeanine Mabunda mpe na Ministre ya yambo Sylvestre Ilunga mpo na likambo ya Congrès esengeli ekutana mikolo mikoya likolo ya état d’urgence asakolaki le 24 mars.

Bokutani bwango bosalamaki lundi na N’Sele. Esalemi mokolo moko nsima na Cour constitutionnelle kokata ete bosakoli bwa état d'urgence na président Félix Tshisekedi mpo na COVID-19 bosalamaki na kolanda Buku likonzi.

Ekateli ya Cour constitutionnelle esukisaki nungu nungu ebimaki nsima na mokambi ya Sénat koloba ete Congrès esengelaki kokutana mpo na kozongisa na nzela bosakoli ya état d'urgence mpo ntembe ezalaki soki yango etosaki Buku likonzi.

Mokambi ya Assemblée nationale, Jeanine Mabunda, ayebisi bapanzi sango nsima na likita lyango ete basololi mingi mpo etali ndenge ya kobatela bana mboka na bokono ya coronavirys ya sika (COVID-19) boye bopanzani na mokili mobimba.

Mme Mabunda alobi mpe lisusu ete ata bato banso bazali kotelela Congrès, misala ya parlement miye mikangamaki mpo na COVID-19 kino le 5 avril misengeli kozonga.

"Misala mingi misalamaka na Sénat na Assemblée nationale. Nakanisi te Congrès nde eleki na litomba sik’oyo, Lokola nalobelaki bino, na misala mya biso, totiyaki masanga ya makanisi mpe masanga mango mapesi makanisi. Na kanisi esengeli na nzela ya cadre institutionnel, misala mya biso ya parlement mikosalama. Yango nde oyo esengeli kosimba na masolo ma biso," elobi Mme Mabunda.

Mokambi ya Assemblée nationale alimboli ete président Tshisekedi atunaki bango ndenge nini bakoki komema biyano na misala ma bi]ango mpo na ndenge ya kobatela bana mboka na bokono boye (COVID-19).

XS
SM
MD
LG