Liens d'accessibilité

Dernières nouvelles

Alanga nzembo moko akufi na bokangemi na Rwanda


Kizito Mihigo, alanga nzembo, azali kobima na boloko ya Nyarugenge, libanda ya Kigali, na Rwanda, 15 septembre 2018.

Kizito Mihigo, alanga nzembo ya ekolo Rwanda oyo ayebana mpo na kotelemela bokonzi ya Paul Kagame, akufi na bokangemi na Kigali. Police ya Rwanda esakoli ete moyembi oyo "amibomi" na ndako ya boloko esika atiyamaki.

Kizito Mihigo akangamaki o’mokolo ya mitano pene na ndelo na Burundi. Police elobi ete alingaki kokima mboka.

Kizito Mihigo azali moko na baye babika na génocide na Rwanda mpe nzembo na ye mingi ezalaki kobenda nkanda ya bakonzi ya mboka na ye.

"Akutamaki akufa na cellule na ye pene na 5h ya ntongo," eyebisi police ya Rwanda.

Na 2015, akatelamaki mibu zomi ya boloko mpo na koyokana na batomboki na ntina ya koluka kokweyisa bakonzi ya Rwanda. Atikamaki na septembre 2018.

Akangamki lisusu vendredi pene na Burundi mpe afundamaki mbala oyo mpo na koluka kokima mboka.

Na loyembo na ye M. Mihigo azalaki kopamela bakonzi ya Rwanda mpo na kozwa genocide lokola likambo etali bato basusu te.

AFP ekundoli ete M. Mihigo azali kaka ye moko te nde akufi na lolenge ya kokamwa.

Mokambi (directeur général) ya bureau ya président Paul Kagame akutamaki akufa na boloko ya ba soda na 2019, nsima ya kozwa etumbu ya mibu zomi mpo na kaniaka, ekomi AFP.

Ndenge moko mpe, na 2015, monganga ya M. Kagame, Emmanuel Gasakure abetamaki masasi na ba policiers na bokangemi na ye.

XS
SM
MD
LG