Liens d'accessibilité

Dernières nouvelles
RDC

15 millions $ : Tshisekedi alobi ezaki détournement te kasi "coop" retrocommission


Président Félix Tshisekedi na bokutani na Fédération ya ba entreprises Belges, na Bruxelles, 20 septembre 2019. (Facebook/Présidence RDC)

Président Félix Tshisekedi alobi na biyano apesi na ba media ya France ete likambo ya 15 millions $ mizali komonana te, lizali détournement to kopengwisa misolo te kasi retrocommission "coop". Alobi elembo moko te emonani likolo ya mokambi ya misala wa ye Vital Kamerhe.

"Ezali te likambo ya bopengwisi mbongo esengelaki kokende na libenga ya l’Etat… Ezali likambo ya retrocommission," elimboli Félix Tshisekedi.

Retrocommission ezali ntango bayike balekisi motuya ya commission esengeli kofutama mpe na ngonga commission efutami bango bazwi mosolo mokoleka likolo.

M. Tshisekedi alimboli ete bolukiluki ya misala ya bosembo bokozala mpo na kotala soki retrocommission esengelaki ekende te na libenga ya l’Etat.

Mokonzi ya RDC ayebisi ete apelalaki inspecteur général ya Finances mpo abimaki libanda ya mosala mopesamelaki ye.

Andimi ete ayambaki inspecteur général ya Finances mpe alakaki ye ete azali nsima na ye ata bato bazali kobangisa ye.

Félix Tshisekedi alimboli mpe mpo etali mokano ya mokambi ya misala na ye Vital Kamerhe oyo akomaki mokanda ya kotelemisa bolukiluki. Mpo na ye, M. Kamerhe asalaki mwa mbeba na kokoma mokamnda yando lokola inspecteur général azali na nse ya bokonzi kaka ya président ya république kasi ya présidence te.

"Yambo kobanda bolukiluki, (inspecteur général ya Finances) asengelaki ayebisia ngai mpo azali na nse na bokambami na ngai. Asalaki makambo lokola procureur. Mokambi ya misala na ngai, mpo na nani nazali na elembo ya mbeba ata moko te kino sika oyo, alikangi kokundolela ye yango. Yango ememaki mobulu tozali komona mabe ntango oyo," ebakisi Tshisekedi.

Mokonzi ya RDC abeti sete ete alingi kobongola bizaleli ya bana ya Congo mpe losilisa kaniaka.

Kasi alobi akokende te ye moko kotimola mbeba ya bato basala kala. "Soki ezali na misala misusu milingi kokundola mbeba wana, mikoki kosala yango", eyebisi Tshisekedi.

Azalaki koyanola na motuna motali Albert Yuma mokambi ya kala ya Gécamines.

Alobi azali na mingi ya kosala mpe azali na ntango ya kotimola mbeba ya bayike te.

M. Tshisekedi ayanolaki na mituna ya chaîne TV5Monde et na nkasa ya sango Le Monde, ya ekolo France.

Voir les commentaires

XS
SM
MD
LG