Liens d'accessibilité

Dernières nouvelles

FCC esengi CACH kobimisa bato ba bango na mbulamatari ya mboka mpe ya bituka


Joseph Kabila, mokonzi ya kala ya RDC mpe mokambi ya FCC apesi mbote na Néhémie Mwilanya, motambwi ya FCC (2e) mpe Emmanuel Ramazani Shadary na bokutani na Kingakati, Kinshasa, 23 décembre 2019. (Sylvie Bongo)

FCC, Front commun pour le Congo, lisanga linene lisangisi mangomba ma poliki mazali nsima na mokonzi ya kala Joseph Kabila, elobi CACH ebima na mbulamatari ya mboka mpe ya bituka, kolanda lisikulu lya président Félix Tshisekedi lisukisi libala lya CACH-FCC.

"Esengeli na CACH kolanda mbano inso ewuti na mokano mwa mokonzi ya mboka Tshisekedi ya kosukisa boyokani. Yango elingi koloba CAHC esengeli kobima na na mbulamatari ya mboka mpe ya bituka," elobi motambwisi ya FCC, mokambi ya kala ya ndako ya mosala ya Joseph Kabila, Néhémie Mwilanya.

Bakambi ba mangomba kati na FCC, balobi ete mbano yango ezali ete coalition (lisanga lya boyokani) ekozala lisusu te kasi mbulamatari ekoti nde na cohabitation (to libala lya bobanba na ndako moko).

Mpo na FCC mokonzi ya mboka azali koluka kokela na makasi matata to nkwokoso kati na CACH na FCC.

M. Mwilanya alobi matata mazali te kati na mbulatari na Assemblée nationale mpo mikolo mileki, Assemblée nationale elekisaki budget mbulamatari epesaki.

FCC eyoki mpe endimi mikano mokonzi ya mboka azwi na mbano na yango yonso, elobi M. Mwilanyi.

FCC epameli CACH na kosalela mamkoki ma ekolo lokola misala mya bosembo mpe misusu mpo na yango moko.

M. Mwilanya alaki ete FCC ekomema makombo na bazuzi mpe ezali kosenga na M. Kabila kobimisa bosolo.

Mpo M. Mwilanyi, Buku likonzi epesi président Tshisekedi bokonzi ya kolongola Ministre wa Yambo te mpe ya kotia informateur ntango Ministre wa Yambo azali nanu na esika.

XS
SM
MD
LG