Liens d'accessibilité

Dernières nouvelles
RDC

Mende afundi Basile Olongo mpo na likambo na diamant


Lambert Mende na ba studios ya VOA, Washington, le 31 janvier 2018

Molobeli ya kala ya gouvernement, Lambert Mende, alobi ete afundi na bazuzi ministre intérimaire ya Intérieur Basile Olongo na mokambi ya pulusu Vital Awashango nsima na bokangemi na ye likolo ya likambo ya diamant liye batimoli bamemelaki ye.

"Bazalaki na violence esalamaki contre ngayi," eyenisi Mende.

Alobi afundi na auditorat géréral ya mampinga.

Ministre intérimaire Basile Olongo alimbolaki na VOA Lingala ete etumbu epesamaki na basoda mpe pulusu baye bakendaki kokanga Lambert Mende mpo batindikaki ye mpe balandaki te lolonga makambo masengeli kosalama.

"Kasi Lambert Mende asali mbeba mpo asimbaki diamant na kobukaka mobeko (code minier). Azali na mikanda ya ba négociants te, baye bamemelaki ye libanga yango mpe bazali te na mikanda ya kopesa bango nzela ya kotimola mpe kotambola na diamant yango. Esengeli bakende koloba ndenge nini basali makombo ya boye liboso ya misala ya bosembo," elobaki M. Olongo.

Na ngambo na ye, M. Mende alobi abuki mobeko te mpo makambo manso masalamaki na alima mpe sembo kasi bato bayaki bokokanga ye nde babukaki mobeko; batosi te immunité parlementaire na ye, ba salaki ye violence mpe babebisaki biloko na ndako na ye.

Nzokande, CEEC (Centre d'expertise, d'évaluation et de certification ya mabanga mpe biloko ya ntalo) elobi na liyebi ete libanga liye lizala na matata lizali diamant ya solo te.

Mende apameli Basile Olongo mpo na kotelemela candidature na ye mpo na gouvernorat ya Sankuru. Candidature ya banda na ye ezali kati ya matata.

XS
SM
MD
LG