Liens d'accessibilité

Dernières nouvelles

Basoda babale mpe moko na basimba minduki "Simba" bakufi na bitumba na Kisangani


Basoda bazali kotambola pene na nzoto ya bawei na Kisangani, Tshopo, 11 juin 2000

Basoda babale ya mampinga ma RDC lokola mpe moko na basimba minduki Simba bakufi na kobetana masasi na Kisangani. Ezalaki na bitumba bingalaki ntango mampinga malingaki kokanga basimba minduki baye, elobi ministre ya etuka ya Tsopo ya Intérieur.

"Kino sika motango mozali ya bato basato bakufi: basoda babale ya FARDC, mpe moko na basimba minduki. Bato basato bazokaki: basoda babale mpe moko na basimba minduki. Basimba minduki 17 bakangami elongo na bayi nzinganzinga na bango: basi ba bango 9 mpe bana 10 na mokonzi na bango Guy Lumumba," elobi ministre Dany Mongo Litondu na liyebisi.

Kolanda ndimbola na ye, basimba minduki bazalaki bato ba yambo ya kobeta masasi ntango mampinga makita na quartier ya Balanga nzembo nsima na kozwa sango ete basima minduki babongisamaki mpo na kosala mobulu.

"Ezalaki misala mya kokanga basimba minduki ba lingomba Sima baye bayokanaki na lingomba ya bonkonko mpe losambo 'Nzambe Luumba'," elimboli ministre Mongo.

Comité ya bokengi ya etuka ezwaki sango ete mangomba mabale maye malingaki kosala mobulu na etuka ya Kisangani na ntina ya kobimisa na boloko moko na bakambi ya ba Simba akangamaki na misala mya bokengi.

Kimya ezongaki na engumba mokonzi ya Tshopo nsima na yango.

XS
SM
MD
LG