Liens d'accessibilité

Dernières nouvelles
RDC

Kinshasa ekozanga mayi ya komela ntango ya ba feti (Syndicat Régideso)


Mwana moko azali komela mayi na mpompi na Kinshasa, 7 mars 2015.

Ba syndicalistes ya basali ya Régideso bakebisi ete engumba mokonzi ya ekolo Congo démocratique ekozanga mayi ya komela na ba feti likolo ya bozangi mosolo mpe makoki. Bazali kofunda ministre ya Finances na koboya kofuta nyongo ya 5,410 millions $.

"Tosengi na bana ya Kinshasa, banda mposo mokoya, kobanda kobomba mayi mpo tokoka te kopesa bango mayi ntango ya ba feti ya suka mbula," elobi na liyebisi mokambi ya délégation syndicale ya Régideso, Alain Senenge.

"Tozali lisusu te na nkisi ya kosukola mayi. Ba machines na biso ezali kokweya 'en panne' mikolo minso mpe, mpo na mbala ya liboso, basali ya Régideso bazangi lifuta sanza misatu," elimboli M. Senenge.

Mokambi ya délégation syndicale ya basali ya Régideso alobi ete bakonzi banso bayebi likambo yango.

Akundoli ete président Félix Tshisekedi apesaki mitindo ete mbulamatari efuta 5,410 millions ya ba dollars ya ba factures ya l’Etat na Régideso, ministre ya Budget apesaki ndingisa kasi ministre ya Finances nde aboyi, elobi M. Senenge.

Na ngambo na ye ministre ya Finances ayebisi ete azali kosala nyonso mpo na kofuta ndambo ndambo ba factures ya mayi ya l’Etat na Régideso.

Ministre ya Finances alobi ete "akoki te kondima kofundama mpo na mokumba ya Régideso mpo yango etali bakambi mpe baye basimbi libenga ya compagnie eye".

Nzokande o’mokolo ya lundi, président Félix Tshisekedi esengeli abeta piololo ya bofungoli usine ya Régideso ya Ngaliema mpo ezongela kopesa mayi nsima na sanza mitano ya bokangemi mpo na kobongisama.

Mpo na bavandi pene na 12 millions, Régideso ebimisaki mikolo minso 560.000 m3. Ekoka kutu te mpo esengeli kopesa 900.000 m3 na mokolo.

Voir les commentaires

XS
SM
MD
LG